Biographie de Joan-Frederic Brun
Joan Frederic Brun, nascut en 1956 a Montpelhièr ont es mètge espitalièr e cercaire, es conegut coma cronicaire (mai que mai dins la revista Oc, que n'es un dels collaborators màgers), poèta e prosator. Coma romancièr, es l'autor, dins la colleccion " A Tots " de l'Institut d'estudis occitans, del Retrach del dieu negre (1987), de Setembralas (1994) e, pus recentament, d'un ensems pivelant de racontes que lor tèma comun son las creaturas estranhas que poblan sai que dempuèi totjorn los païsatges e mai l'imaginari dels omes dins las garrigas e los causses des nord del pais montpelhierenc : Lo Temps clar de las encantadas (2005).
Luonh, raconte de vertat entre mort " viscuda " e renaissença a la vida a mand de se pèrdre, marca un moment fort dins l'itinerari de l'autor. Per aquo, e per plan mai d'autras rasons que lo legeire aurà lèu fach de descubrir, aquel raconte entre somi e realitat s'amerita, coma o escriu Joan-Claudi Forêt dins son postfaci, " de far data dins la literatura occitana per la noveltat de son prepaus, de son genre e de son enjoc ".
